सेभोक पुलिसद्वारा लागु औषधसहित पाँचजना पक्राउ

खरसाङ ,18 जुलाई(निसं): खरसाङ पुलिस थाना अन्तर्गत सेभोक पुलिसको टोलीले परिजात नगर, सेभोकस्थित एक पसलमा छापा मारी महेन्द्र बोहरा र पोफ्मा बोहरालाई पक्राउ गरेको छ। उक्त छानबीनको क्रममा उनीहरूको पसलबाट 1 हजार 6 सयवटा निट्राजेपाम ट्याब्लेट्स आईपी 10 ग्राम जफ्त गरेको छ।यसको साथै लागुऔषध बिक्रीबाट प्राप्त भएको एक लाख रुपियाँसमेत जफ्त गरेको जानकारी प्राप्त भएको छ। उक्त खोजी-तलासी तथा जफ्त कार्य खरसाङ्का जोइन्ट बीडीओको उपस्थितिमा एनएसपीएस ऐन अन्तर्गतका सम्पूर्ण कानूनी प्रक्रिया पालना गरी गरिएको र सम्पूर्ण कार्यको भिडियो रेकर्डिङ समेत गरिएको जानकारी गराइएको छ। यस सम्बन्धमा खरसाङ पुलिस थानामा केस संख्या 97/25, धारा 21(ए)/22(ए)/29 एनडीपीएस ऐन अन्तर्गत मुद्दा दर्ता गरिएको छ। दुवै अभियुक्तलाई दार्जीलिङस्थित विशेष एनडीपीएस न्यायलयमा पेश गरिएको थियो। जस अनुसार अभियुक्त महेन्द्र बोहरालाई 3 दिनको पुलिस रिमाण्डमा पठाइएको छ। यसअघि पनि गत 14 जुलाईको दिन सेभोक पुलिसले पारिजात नगरका किशन राई उर्फ पुरेकी र सृजना राईलाई पक्राउ गरी उनीहरूको साथबाट 1 सय 50 वटा प्रोक्सिमेक स्पास क्याप्सुल्स जफ्त गरेको थियो। यसबारे खरसाङ थानामा केश संख्या 95/25 धारा 21(बी)/22(बी)/29 एनडीपीएस ऐन अन्तर्गत मुद्दा दर्ता गरिएको छ। हाल दुवै अभियुक्त जेल हिरासतमा रहेका छन्‌‍ भनी पुलिस सूत्रले जानकारी दिएका छ।