दार्जीलिङ,12 जुलाई(निसं): 211औं भानु जयन्तीको दुईदिन अधि सप्ताहको अन्तिम दिन आज यहाँको प्रतिष्ठित शैक्षिक संस्थान सेन्ट रोबर्टस् हायर सेकेण्डरी स्कुलले एक साधारण कार्यक्रमका साथ आदिकवि भानुभक्त आचार्यको जन्मजयन्ती पालन गरयो भनी सह शिक्षक तथा मिडिया प्रभारी सुनील राई प्रणामीले विज्ञप्ति मार्फत् जानकारी दिएका छन्। राईले बताए अनुसार, विद्यालयको नेपाली अकादमीद्वारा आयोजित यस कार्यक्रममा विशेष रूपले विभिन्न साजवाजको साथमा पाँचौंदेखि बाह्रौँ कक्षासम्मका जम्मा 40 जना विद्यार्थीले संगीतमय शैलीमा एकसाथ रामायण पाठ गरेर सबैलाई मन्त्रमुग्ध बनाए । यसबाहेक दश जना विद्यार्थी कविले केही स्वरचित र भानुभक्त आचार्यका एकाध लोकप्रिय फुटकर कविताहरु वाचन गरे। कक्षा नवौं (सी)- का विद्यार्थी अभिमन्यू सिंह र कक्षा एघारौँ (कला)- का विद्यार्थी हेमन्त छेत्रीले सञ्चालन गरेकाे उक्त कार्यक्रममा सह- शिक्षक तथा नेपाली अकादमी संयोजक जोगेन दर्नालले स्वागत सम्बोधन गरे। यसका साथै आजको कार्यक्रम अरु वर्षहरुमा भन्दा राम्रो भएको र यसलाई अझ वैभवशाली बनाएर लानुपर्नेमा जोड़ दिँदै प्रधान अध्यापक रेभरेन फादर माईकल सिंहले सम्पूर्ण विद्यालय परिवारलाई 211औं भानुजयन्तीको बधाई शुभकामना व्यक्त गरे। उल्लेखनीय छ, यस विद्यालयले शैक्षिक क्रियाकलाप संगै भाषा साहित्य र सुगम संगीत क्षेत्रमा पनि विद्यार्थीहरूलाई समेटेर प्रत्येक पर्व उत्सवमा कुनै न कुनै कार्यक्रम गरिरहेको छ। त्यसै उत्सवको एक भागको रूपमा विद्यालयको शैक्षिक प्रणालीलाई ध्यानमा राखेर आज दुईदिन अगाडि नै भानुजयन्ती पालन गरिएको जानकारी सह शिक्षक तथा मिडिया प्रभारी सुनील राई प्रणामीले विज्ञप्ति मार्फत् दिएका छन्।
